Even before San Francisco

Ha öich ganz vergässä vo mim weekend in Seattle z verzeuä. Mir si mit m Tennis Team nach Seattle anes Turnier gflogä. Isch u ne cooli Erfahrig gsi; I bi doch no nie irgendwo härä gflogä "nur" für ds Tennis spiele. Bi ganz "excited" gsi und has chuum chönnä abwarte. Bi nid enttüüscht worde, es isch geniau gsi. D Flug isch ganz churz gsi aber trotzdem super gsi mit dr ganze Mannschaft und üsne zwö coaches z reisä. I ha mi scho sehr uf ds Turnier gfröit gha und natürlich o für d Stadt chli azluege. Z Turnier isch (nach däm aui nid so guet hei gspiut und aui am erstä Tag hei verlorä gha) ganz akzeptabu gsi. Mir hei wie immer sehr vieli Matchä gha und todmüed am Abe ids Bett gange. Das isch ds ganze WE so gange und leider hei mir überhoupt ke Zit gha zum d Stadt aluege. Ds bestä isch gsi: I bi di letschti gsi wo no ä Match het müsse spiele und i bi irgendwie 2/6 0/5 und 0/30 im Game hinger gsi. I ha ganz schlächt gspielt gha und i ha o ke Lust me gha; bi u müed gsi und ha nur no hei wöuä ga. Aber denn het mi dr Coach nomau versuecht z motiviere und i ha mir dänkt: Ok chum, eis einzigs Mau versuechsch jez no guet z spiele und ufzhole, wes nid funktioniert denn voilà quoi, denn hesch es wenigstens probiert. Und siehe da, es het klappet. Ha plötzlich afa guet spiele und s het afa Spass mache :-) Isch ä rächtä fight gsi, aber nach s paar Stung umerennä hani schlussendlich gwunne! Ha u Fröid gha :-) Wasi no nid ha gwüsst: Ha nur 50 Min Zit gha vom Platz z rennä, z stretchä und churz go z dusche bevor mir hei müsse zum Flughafä ga. I bi grad chli gschockt gsi, dassi sooo lang ha gspiut und dass es tatsächlich scho so spät isch gsi. Ha mi scho dr ganz Tag uf nä längi warmi Duschi gfröit, aber es isch leider nüt drus worde. Naja. Es isch de doch nid so schlimm gsi, da ig ja mi Match ha gwunne gha :-) Das het mi motiviert! Jaja ... so viu zum Tennis.

Mir si imnä Hotel gsi - poa. U nes tüürs Hotel und vor auem mega schön. Mir si jewiils z zwöit im Zimmer gsi und mir hei sooo grossi Bett gha. I ha ja dehei o nes grosses Bett - vo däm här nüt speziells - aber sit i hie ir USA bi, hani nur es mega chliises Bett und drum hani mi u gfröit so nes riesä Bett z ha wieder mau. Isch würklich grad rächtä Luxus gsi i däm Hotel. S hätt o nes Pool gha zum go badä (leider ke Zit gha für söttigä Spass) und z zmorgä isch o u guet gsi für Amerikanischi Verhäutnis. Mir hei e gueti Zit gha in Seattle, isch würklich cool gsi :-)

So ihr liebä, i muss jez mau go schlafe. Morn steit ä wichtigi Prüefig a und i muess fit si, demit i si cha bestah. Machets guet und bis gli

öii Sarah

PS: dir wüsset nid was mit hüt passiert isch: Bi lang ir Bibliothek gsi und ha für mini Prüefig glernt und woni ha wöuä ids Zimmer zrügg loufä hets mega fescht grägnet (mir hei scho ca. 10cm Schnee und denn hets vou i Schnee inägrägnet - äää). Da's dunku isch gsi hani nid viu gseh und mini Gedanke si o überhoupt nid bim loufä gsi, sondern bi derä Prüefig vo morn. Ha auso überhoupt nid ufpasst woni härä loufä und buuuum - d Sarah louft miz inä riiiesä Glunggä inä. Nid nur mit eim Fuess, nei, grad mit beidnä natürlich - d Schue und d Sockä PFLOTSCHNASS ... hmm ... hehe ...