San Francisco

Hey ihr liebä

Letscht Wuchä (vom 21.11.-26.11.) bini in San Francisco gsi mit ere Kollegin vo hie. Hei i sägä öich, SFO isch sooo nä schöni Stadt - ungloublich. Mir heis u guet gha während denä paar Täg und hei u viu chönnä aluege:

• D Golden Gate Brigde - i sägä nume: WOW
  Dr Golden Gate Park - u schön
  Alcatraz (es ehemaligs Gfängnis) - u krass gsi das azluege
  Coit Tower
  Union Square
  Alamo Square - döt si di berüemte Victorian Houses/ Postcard row
  Fisherman's Warf
  Cliffhouse - diräkt am Meer, so schön
  Transamerica Pyramid
  ...

Jaja, sogar mit de Cable Cars si mir umegfahre :-) I chönnti jez sooo viu über San Francisco schriebe, aber i versueche mi churz z haute - versproche.

Mir si imnä Hostel gsi und döt innä hets mega komisch gschmöckt und es isch u aut gsi. Mir hei scho dänkt, wow wo si mir de da glandet. Aber es isch cool gsi und d Lüt im Hostel si u fründlich gsi. Mir si es paar Mau am Abe id Chuchi gange - döt si immer viele Gäst vom Hostel und d Bsitzer ghocket und hei gmüetlich es paar Bierli trunke. Mir hei üs dezue gsetzt und heis u lustig gha mit denä. A eim Abe si mir när mit ihnä chli go festä ines Pub. Das wär eigentlich mega längwilig gsi und di angere Lüt si rächt schreegi Vögu gsi, aber mir heis gliich mega lustig gha (nach nes paar Bier). Eh ja, am 2i hei si zue gmacht und mir hei müesse ga. Niemer het wöuä go schlafe, auso si mir haut wieder id Chuchi gange und hei üsi chliini Party witergfüert. Je später dass es isch worde, desto me hei aui afa spinnä und plötzlich hei aui agfange ufem Tisch afa z tanze ... hehe ... Isch würklich mega lustig gsi und i bi schlussendlich ersch am 6i ids Bett cho. Da mir ja eigentlich z SFO o chi öpis vor Stadt hei wöuä gseh (lol) si mir haut scho am 9i wieder ufgstange. Resp. mir hei denn wöuä ufstah, I has aber leider nid usem Bett gschafft bis am 10ni.

Das isch di einti Nacht gsi. D Nacht vorher si d Daniela und ig ine Club gange. Zersch hei mir ca. 30 Min dussä irä längä Schlange müsse aastah, ersch när hei mir inä chönnä ga. I bi mir irgendwie vor cho wie im Fium ;-) Ja, när si mir dinnä gsi und es isch rächt abgange. D Musig isch meistens cool gsi und mir hei gar nüme wöuä ufhörä tanzä (gloubet dir das?! - I has säuber fasch nid gloubt hehe). Irgendwenn hei si när ä sonä Kontest veranstautet. 3 girls u 3 guys hei ar Stangä tanzet - nid würklich guet muess mä dezue sägä. D Lüt si mega fies gsi, sie hei si voll uspfiffä ;-) oops ... Eh ja, uf jedä Fau isch es o mega lustig gsi und mir si o wieder nid vor de 5ä ids Bett cho wüu mir no ir Chuchi hei verbii gluegt wo mir hei si cho am 4i. Mir si gar nid mau sooo müed gsi nach nes paar Kafis am Morge :-) hehe Dir gseht, mir heis würklich lustig gha.

O während em Tag hei mir sooo viu erläbt. Unter angerem die schlimmsti Busfahrt ever. Das verzeui jez aber lieber nid, isch würklich ä Katastrophä, das weit dir gar nid ghörä. Süsch isch aus super gsi; d Lüt si u fründlich und hiufsbereit in SFO (so wie di meistä Amis). Chunnt doch eifach einä zu üs härä wo mir am Chartä studiere si gsi und fragt öb mir Hiuf bruuchä bim luege wo mir si. Es het sich usegsteut, dass er ä Busfahrer isch und grad Pousä het ei Stung. Dä Typ isch när mit üs mit cho und het üs bis döt härä begleitet wo mir hei härä wöuä. Isch no nätt gsi hei mir gfunge, denn so hei mir üs nid verloffä ;-) lol.

So, gnue gret jez ;-) hehe. Viu Spass bim Fotis aluege und bis gli
öii Sarah

soooo excited to come back home and see you again :-)